Khamoshi ki deewaron ne ujhaad diya hai !

Jabse kabootaron ne tera rukh kiya hai, 

                   Mera ghar-aangan sab soona kar diya hai,

Har roz chhat par mehfil sajti thi jo kabhi, 

                   Aaj teri dehleez par basera kar liya hai..

Kal tak chahchahahat se abaad jahan, 

                    Teri rehmat-e-shifaa ne sunsaan kar diya hai,

Guzarte yahin se aaj bhi chupke se, 

                    Par meri sadaon se khud ko anjan kar diya hai,

Daane-pani ki chaahat mein gunjta har kona, 

                    Aaj sannaton ne ghar ko gher liya hai..

Woh mehfil jo raunaq bhari abaad thi, 

                    Aaj khamoshi ki deewaron ne ujhaad diya hai,

Tere ishq-o-jashn ki mehak ne shayad yun, 

                    Meri tanhai ko ab aur gehra kar diya hai. !    

Kis baat ka maatam manate ho !

Raakh par maghfirat ki duaayein sajate ho,

Taaza phulon ko ashkon mein murjhate ho,

Kaash ek lamha milta, Main zinda ho uthta,

Ik anjaan haqeeqat se, Waaqif-e-raaz hota..

Kyun sannaton mein khoyee hui aas jagate ho,

Cheekh haal-e-zakhmon ko gehra ubharte ho,

Bejaan lamhon mein kyun saansein bharte ho,

Dafan ehsason pe khwahish-e-kafan odhte ho..

Be-rooh jismon par tasalli ke aansu bahaate ho,

Bujhte chirag pe ummeed ka tel zaaya karte ho,

Waqt-e-mohabbat nafrat ki gardish mein guzar,

Mazar-e-deedar kis baat ka maatam manate ho !

Rehmat-e-noor utar aaye !

Ye pal zindagi ke yunhi nikhar jayein,

Lamhe khamoshi mein sanwar jayein,

Aadhe-adhure khwab bune the kabhi,

Hazaaron khwaahishein talab thi jinki,

Aaj taabir-e-haqiqat yun lipat jaayein…

Badee talab arse se deedar-e-khuda ki,

Dua-e-asar se rehmat-e-noor utar aaye !

Zakhm-e-dil ka marham nahin !

Shak ka ilaaj, Zakhm-e-dil ka marham nahin,

Imtihaano Nuskhon se darindagi dhulti nahin, 

Dard-e-gham ka likhaa har kissa mitta nahin, 

Mukammal toota insan, Pehle sa judta nahin !

Dil yoon tanha na tha !

Dil yoon tanha na tha, Maayus is kadr na tha,

Bhula-bhatka tha,Zindagi se thukraya na tha..

Ab khudi se uljhaa, Khudee mein bhatkaa hun, 

Khud se rooth, Rooh bhar tootkar bikhra hoon, 

Tanhayiyon mein gum,Wajood mein simta hun!

Baap ke ehsas se aabad jee uthta hun!

Gham ke ashkon mein dubta hun,Jab haqiqat se rubaru hota hun,

Aaj bhi woh pal yaad hai, Jo teri paidaaish mein mehak uthaa tha,

Chulbuli natkhati harkaton se, Ghar-aangan muskan se bhara tha..

Maa ki aanchal bhari loriyan, Baba ki peeth par lakhon sawaariyan,

Nana-Nani ke laad mein pala tha,Dada-Dadi ke dular se dhula tha,

Waldain ki khalis muhabbat mein,Chain-o-qarar bhi jaan-nisar tha..

Waqt ne nazron par parda daal, Khamoshi ka sa kohra bichha diya,

Budhapa qareeb aane laga,Kamzor nazar mein waqt thaharne laga,

Jo Baba ki rat lagaye tha, Aaj roobaru bhi nazar-andaaz karne laga..

Meri aulaad ke is taghaful se, Khalish andar hi andar se khane lagi,

Dil ke sunsan sannaton mein,Khamoshi ansuon mein pighalne lagi..

Yadein zarur aafat deti hain, Par ab dard chupana fitrat ban gayi hai, 

Tutkar bhi mazbut judta hun, Baap ke ehsas se aabad jee uthta hun!

Masoom (1983) | Tujhse Naaraz Nahi Zindagi !

https://youtu.be/Pc8_TDHMdis

https://gaana.com/lyrics/tujhse-naraz-nahin-zindagi-3